प्रगतिशील उपयोगिता आजको आवश्यकता ः आनन्द मार्गका अनुयायीहरू

राष्ट्रिय आवाज 

जनकपुरधाम , चैत्र १८ गते

युनिभर्सल प्रउटिष्ट युवा संघ धनुषाको आयोजनामा जनकपुरधाममा ‘सर्वभक्षी विश्वव्यापी पूँजीवादको एकमात्र विकल्प प्रगतिशील उपयोगिता’ विषयक पत्रकार सम्मेलन सम्पन्न भएको छ। सम्मेलनमा आनन्द मार्ग प्रउत (Progressive Utilization Theory - PROUT) तथा नयाँ मानवतावादी शिक्षा प्रणालीसम्बन्धी विषयहरूमा गहन छलफल गरिएको थियो।

कार्यक्रममा प्रउत सिद्धान्तको सामाजिक, आर्थिक र आध्यात्मिक प्रभावबारे वक्ताहरूले आफ्नो मन्तव्य राखे। प्रमुख वक्ता आचार्य सत्यव्रतनन्दले वर्तमान पूँजीवादी व्यवस्थाले केवल आफ्नो नाफाका लागि वातावरणदेखि मानव सभ्यतालाई समेत विनाश गर्ने कार्य गरिरहेको आरोप लगाए।

उनले भने, “पूँजीवादको केन्द्रमा केवल नाफा हुन्छ, जसले गर्दा नैतिकता, करुणा, सामाजिक न्यायजस्ता मानवीय मूल्यहरू उपेक्षित भइरहेका छन्। समाजमा समान अवसर, न्यायपूर्ण वितरण र दिगो विकास आवश्यक छ, जसलाई प्रउत सिद्धान्तले सुनिश्चित गर्न सक्छ।”

अन्य वक्ताहरूले पनि वर्तमान आर्थिक तथा सामाजिक असमानताको समाधानको रूपमा प्रउत सिद्धान्तको महत्वलाई जोड दिए। कार्यक्रमका सहभागीहरूले समतामूलक समाज निर्माणका लागि प्रउत सिद्धान्तको व्यवहारिक कार्यान्वयन आवश्यक रहेको बताएका थिए।

यस पत्रकार सम्मेलनले नयाँ मानवतावादी शिक्षा प्रणालीको अवधारणासमेत उजागर गरेको थियो। वक्ताहरूका अनुसार शिक्षा केवल किताबी ज्ञानमा सीमित नभई नैतिक, आध्यात्मिक, र व्यवहारिक पक्षमा केन्द्रित हुनुपर्छ।

कार्यक्रममा विभिन्न क्षेत्रका बुद्धिजीवी, पत्रकार तथा समाजसेवीहरूको उपस्थिति रहेको थियो। सम्मेलनले आनन्द मार्गको दार्शनिक दृष्टिकोणलाई समाजमा सकारात्मक परिवर्तनको संवाहकको रूपमा प्रस्तुत गरेको छ।

आचार्य पुष्येशानन्द अवधूत,आचार्य सत्यव्रतानन्द अवधूत, इन्जिनियर महेश यादब , सिन्धु हमाल, पत्रकार बद्री नाथ झा, हादिस खुद्दार, ईन्द्र भुषण यादव, मनिषा मंडल लगायतका उपस्थिति रहेका थिए।