संघीय लोकतान्त्रिक गणतन्त्रको विकल्प छैन – महासचिव प्रमेश्वर

राष्ट्रिय अवाज

    जनकपुरधाम

लोकतान्त्रिक समाजवादी पार्टी (लोसपा) नेपालका केन्द्रीय महासचिव प्रमेश्वर साहले संघीय लोकतान्त्रिक गणतन्त्रको कुनै विकल्प नरहेको स्पष्ट पारेका छन्।

धनौजी बजारस्थित राम जानकी मन्दिरको प्राङ्गणमा आयोजित लोसपा नेपाल, धनौजी गाउँपालिकाको प्रथम गाउँपालिका अधिवेशनलाई सम्बोधन गर्दै महासचिव साहले भने, “सैकडौँ जनताको सहादत, बलिदान, त्याग र तपस्या मार्फत प्राप्त संघीय लोकतान्त्रिक गणतन्त्र कुनै व्यक्तिको कृपा वा दया होइन। यो हामीले संघर्ष गरेर ल्याएको उपलब्धि हो।”

उनले संघीयता, लोकतन्त्र र गणतन्त्रलाई कमजोर पार्ने कुनै पनि प्रयासप्रति सावधानी अपनाउनुपर्ने उल्लेख गर्दै जनताको अधिकारमाथि कुण्ठित हुने प्रयासहरू विरुद्ध सतर्क रहन आग्रह गरे।

  लोसपा नेपाल धनौजी गाउँपालिकाका उपेन्द्र मण्डलको अध्यक्षतामा भएको कार्यक्रममा लोकतान्त्रिक समाजवादी पार्टी (लोसपा) नेपालका केन्द्रीय सचिव सदाशिव मिश्रले मधेसवाद जनताको मौलिक अधिकार, पहिचान र समान प्रतिनिधित्वका लागि भएको आन्दोलन भएको स्पष्ट पारेका छन्।

मधेसवादको सन्दर्भमा बोल्दै मिश्रले भने, “मधेसवाद कुनै जातीय वा क्षेत्रीय विद्रोह होइन, यो त राज्यबाट बहिष्कृत, पछाडि पारिएको समुदायको हक र पहिचानका लागि लडिएको ऐतिहासिक संघर्ष हो।”

लोसपा नेपाल, धनौजी गाउँपालिकाको प्रथम गाउँपालिका अधिवेशनमा मधेस प्रदेश उपाध्यक्ष राम ज्ञान् मण्डल , मधेसवादी युवा नेता गयानेन्द्र झा , लोसपा नेपालका धनुषा अध्यक्ष तथा मेयरका प्रत्यासी युवा नेता जिवेन्द्र झा , सिताराम ठाकुर , रोशन झा ,सन्तोष मण्ड लगायतकाले आ आफनो मन्तव्य व्यक्त गरेका थिए ।