राष्ट्रिय दलित पत्रकार संघ नेपालको मधेश प्रदेश प्रथम अधिवेशन जनकपुरधाममा सम्पन्न

सुरेन्द्र रविदास 

जनकपुरधाम, चैत्र ३१ — राष्ट्रिय दलित पत्रकार संघ नेपालको मधेश प्रदेश प्रथम अधिवेशन जनकपुरधाम स्थित एक होटलमा भव्य रूपमा सम्पन्न भएको छ। कार्यक्रमको उद्घाटन मधेश प्रदेशका सभामुख रामचन्द्र मण्डलले गरेका थिए।

अधिवेशन संघका प्रदेश अध्यक्ष कैलाश दासको अध्यक्षतामा सम्पन्न भयो। कार्यक्रममा संघका केन्द्रीय तथा प्रदेश पदाधिकारीहरू, विभिन्न जिल्लाबाट आएका प्रतिनिधिहरू, सञ्चारकर्मी, अधिकारकर्मी र समुदायका अगुवाहरूको उल्लेखनीय उपस्थिति रहेको थियो।

सभामुख मण्डलले जातीय विभेद विरुद्ध दलित पत्रकारहरूको सक्रियतामा जोड दिँदै संविधानमा सुनिश्चित समानता र न्यायलाई व्यवहारमा उतार्न सञ्चार क्षेत्र निर्णायक हुने बताए। “समतामूलक समाज निर्माणमा सञ्चारकर्मीहरूको भूमिका अत्यन्त महत्वपूर्ण हुन्छ,” उनले उल्लेख गरे।

कार्यक्रममा मठियानी नगरपालिकाका मेयर हरि मण्डलले दलित समुदायमाथि भइरहेको विभेदविरुद्ध सशक्त आवाज उठाउन संघलाई आह्वान गरे।

अधिवेशनमा दलित अधिकार क्षेत्रमा योगदान पुर्‍याउँदै आएका अधिकारकर्मी तथा समाजसेवीहरूलाई सभामुख मण्डलद्वारा मायाको चिनो प्रदान गर्दै सम्मान गरिएको थियो।

वक्ताहरूले दलित पत्रकारहरूको योगदान, उनीहरूले सामना गरिरहेका चुनौतीहरू र समाधानका उपायहरूबारे धारणा राखे। सञ्चार क्षेत्रमा समावेशिता र समान अवसरको सुनिश्चितताका लागि नीतिगत तहमा ठोस पहल आवश्यक रहेकोमा सबैले जोड दिए।

अधिवेशनमा संघको भावी कार्ययोजना पनि सार्वजनिक गरिएको थियो, जसअन्तर्गत जिल्लास्तरीय संरचना विस्तार, पत्रकारहरूको क्षमता अभिवृद्धि, साझेदारी सञ्जाल निर्माण, र दलित युवाको सञ्चार क्षेत्रमा सहभागिता वृद्धि प्राथमिकतामा राखिने बताइएको छ।

अधिवेशनको समापन गर्दै अध्यक्ष कैलाश दासले यस अधिवेशनले दलित पत्रकारहरूको सामाजिक र व्यावसायिक पहिचान सुदृढ गर्ने दिशामा मार्गनिर्देशन गरेको बताए। “यो केवल संगठनात्मक औपचारिकता नभई, न्यायपूर्ण समाज निर्माणमा सञ्चारकर्मीहरूको भूमिकालाई स्पष्ट पारेको प्रयास हो,” उनले भने।