सशस्त्र प्रहरी ८ नम्बर गणको १८औं स्थापना दिवस सम्पन्न, गणपतिको समर्पणपूर्ण प्रतिबद्धता

राष्ट्रिय आवाज 

जनकपुरधाम, वैशाख १०

सशस्त्र प्रहरी बल नेपाल ८ नम्बर गण हे.क्वा. मुजेलिया, धनुषाले बुधवार साँझ आफ्नो १८औं स्थापना दिवस औपचारिक समारोहका साथ सम्पन्न गरेको छ। कार्यक्रम सशस्त्र प्रहरी गणका प्रमुख एसपी निर्मल खड्काको अध्यक्षतामा आयोजना गरिएको थियो।

समारोहका प्रमुख अतिथि सशस्त्र प्रहरी बल मधेस प्रदेश प्रमुख डीआईजी काली दास धबौजी थिए भने विशिष्ट अतिथि रूपमा प्रमुख जिल्ला अधिकारी रामुराज कडरिया सहभागी थिए। कार्यक्रममा विभिन्न सुरक्षा निकायका प्रतिनिधिहरू, स्थानीय निकायका पदाधिकारी, पत्रकार तथा समुदायका अगुवाहरूको उल्लेखनीय उपस्थिति थियो।

उक्त अवसरमा गणपति एसपी खड्काले ८ नम्बर गणले स्थापना कालदेखि अहिलेसम्म मुलुकको सुरक्षा, सीमाको निगरानी, विपद् व्यवस्थापन र सामुदायिक समन्वयमा खेलेको भूमिकालाई स्मरण गर्दै भने,

“हामी सशस्त्र प्रहरीको भूमिका केवल सीमित सुरक्षा गस्तीमा होइन, नागरिकको जीवन रक्षा, आपतकालीन सहायता र सामाजिक सद्भावमा समेत केन्द्रित छ। आगामी दिनहरूमा प्रविधिको अधिकतम प्रयोग गर्दै अझ जनमैत्री र प्रभावकारी सेवा प्रवाह गर्न हामी प्रतिबद्ध छौं।”

समारोहमा विगत १८ वर्षको योगदानको पुनरावलोकन गर्दै विपद् व्यवस्थापन, मानव–स्रोत विकास तथा समुदायसँगको सहकार्यमा केन्द्रित कार्यक्रमहरूको जानकारी दिइएको थियो।

प्रमुख अतिथि डीआईजी धबौजीले सशस्त्र प्रहरी बलले राज्य सुरक्षामा निभाएको भूमिकालाई प्रशंसायोग्य भन्दै भविष्यमा थप दक्ष, उत्तरदायी र प्रविधिमैत्री संरचना निर्माण गर्न निर्देशन दिए।

प्रमुख जिल्ला अधिकारी कडरियाले सुरक्षामा सशस्त्र प्रहरीको समर्पणप्रति धन्यवाद दिँदै स्थानीय प्रशासन र सुरक्षाकर्मीहरू बीचको सहकार्य अझ मजबुत हुनुपर्ने बताए।

उत्कृष्ट कार्यसम्पादन गर्ने प्रहरी कर्मचारीहरूलाई सम्मान तथा पुरस्कार प्रदान गरिएको उक्त कार्यक्रममा जनचेतनामूलक कार्यक्रमहरू पनि प्रस्तुत गरिए।

समापनमा अतिथिहरू लाई धन्यवाद ज्ञापन गर्दै गणले राष्ट्र, संविधान र जनताको सेवामा निरन्तर समर्पित रहने अठोट व्यक्त गरेको थियो।