तेश्रो मेयर कप टी–२० क्रिकेट प्रतियोगिता शुक्रबारदेखि सुरू, भारतका चार टोलीसहित १२ टिमको सहभागिता

सुरेन्द्र रविदास 

जनकपुरधाम, वैशाख २५ — जनकपुरधाम उपमहानगरपालिकाको आयोजनामा तेश्रो मेयर कप टी–२० क्रिकेट प्रतियोगिता शुक्रबार (वैशाख २६ गते) बिहान ९ बजे बाट सुरू हुने भएको छ। प्रतियोगिता सम्बन्धी जानकारी दिन बिहीबार पत्रकार सम्मेलन आयोजना गरिएको थियो।

पत्रकार सम्मेलनमा जिल्ला क्रिकेट संघ धनुषाका सचिव आशिष झाले यसपटकको संस्करणमा कुल १२ टोली सहभागी हुने जानकारी दिए। तीमध्ये मधेश प्रदेशका आठ जिल्लाबाट टोलीहरू रहनेछन् भने भारतबाट चार टोलीले पनि सहभागिता जनाउनेछन्।

जनकपुरधाम उपमहानगरपालिकाका प्रमुख मनोज कुमार साह, जिल्ला क्रिकेट संघका सदस्य सरोज मिश्र, प्रशिक्षक नवीन सिंह र लाला गुनवन्त सिंह पनि कार्यक्रममा सहभागी थिए। उनीहरूले प्रतियोगिता क्षेत्रीय खेल विकासको महत्वपूर्ण अवसर भएको उल्लेख गरे।

उद्घाटन खेल शुक्रबार बिहान ९:०० बजे धनुषा र महोत्तरी बीच हुने छ। दोस्रो खेल दिउँसो १:३० बजे सर्लाही र सप्तरीबीच हुनेछ।

तेश्रो संस्करणको मेयर कप प्रतियोगिता खेलाडीहरूको प्रतिभा प्रदर्शनको महत्वपूर्ण मञ्चका रूपमा लिइएको छ, जसले क्षेत्रीयस्तरमा क्रिकेटको विकास र युवा खेलाडीहरूलाई हौसला प्रदान गर्ने विश्वास आयोजकले लिएका छन्।