जनकपुरलाई अन्तर्राष्ट्रिय विवाह गन्तव्य बनाउन सांसद महतोको माग

राष्ट्रिय आवाज 

जनकपुरधाम, ०१ जेठ – ऐतिहासिक तथा धार्मिक दृष्टिकोणले अत्यन्त महत्वपूर्ण मानिने जनकपुरलाई अन्तर्राष्ट्रिय विवाह गन्तव्यको रूपमा विकास गर्न नेकपा एमालेकी सांसद जुली महतोले सरकारसँग माग गरेकी छन्।

प्रतिनिधिसभाको बैठकमा बोल्दै सांसद महतोले भगवान श्रीराम र माता जानकीको विवाह स्थलका रूपमा चिनिएको जनकपुरधाममा विवाह पर्यटनको अपार सम्भावना रहेको उल्लेख गरिन्। "जनकपुर केवल धार्मिक तीर्थस्थल मात्र होइन, विश्वकै अनुपम विवाह गन्तव्य बन्न सक्ने क्षमता बोकेको ठाउँ हो," उनले भनिन्।

महतोले विवाह मन्दिर, जानकी मन्दिर, सप्तसागर, दशरथ भवनजस्ता स्थलहरूको संरक्षण, सौन्दर्यीकरण र प्रचारप्रसारमार्फत जनकपुरलाई विवाह पर्यटनको केन्द्रका रूपमा स्थापित गर्न सकिने धारणा राखिन्। उनले सरकारलाई वार्षिक राम-जानकी विवाह महोत्सवलाई अन्तर्राष्ट्रियकरण गर्ने रणनीति तयार गर्न पनि आग्रह गरिन्।

"यदि पूर्वाधारमा सुधार गरियो भने, विदेशी जोडीहरूले पनि जनकपुरमा वैवाहिक बन्धनमा बाँधिन इच्छा राख्नेछन्," सांसद महतोले भनिन्। उनका अनुसार यस प्रकारको पहलले स्थानीय रोजगारी, होटल व्यवसाय, हस्तकला तथा संस्कृति प्रवर्द्धनमा सकारात्मक प्रभाव पार्नेछ।

पर्यटन तथा संस्कृति मन्त्रालयले पनि जनकपुरमा वैवाहिक पर्यटन प्रवर्द्धनका सम्भावनाबारे अध्ययन गरिरहेको जनाइएको छ।