मुख्यमन्त्री अन्तर–प्रदेश कबड्डी प्रतियोगिता जनकपुरधाममा सुरु, सातै प्रदेशको सहभागिता

माेनु गुप्ता 

जनकपुरधाम, असार १२ गते, बिहीबार 

मधेश प्रदेश सरकारले आयोजना गरेको मुख्यमन्त्री अन्तर–प्रदेश राष्ट्रिय कबड्डी प्रतियोगिता २०८१/८२ जनकपुरधाममा आज बिहीबार देखि सुरु भएको छ। प्रतियोगिताको भव्य उद्घाटन मधेश प्रदेशका मुख्यमन्त्री सतिश कुमार सिंहले गर्नुभयो।

मुख्यमन्त्री सिंहले उद्घाटन समारोहमा सम्बोधन गर्दै कबड्डी जस्ता मौलिक तथा जनप्रिय खेलहरू स्वास्थ्यका लागि मात्र होइन, प्रदेशको गौरव वृद्धि र अन्तर्राष्ट्रिय पहिचानको माध्यम बन्न सक्ने बताउनुभयो। उहाँले खेलकुद पूर्वाधार निर्माणदेखि खेलाडी प्रशिक्षण तथा आवश्यक सुविधा उपलब्ध गराउन प्रदेश सरकारले नीति तथा कार्यक्रममार्फत बजेट विनियोजन गरेको उल्लेख गर्नुभयो।

* ‘खेलाडीको मेहनत प्रदेशको इज्जत’

मुख्यमन्त्री सिंहले पछिल्ला वर्षहरूमा मधेशका खेलाडीहरूले राष्ट्रिय तथा अन्तर्राष्ट्रिय मैदानमा पुर्याएको योगदानको प्रशंसा गर्दै खेलकुदको विकासमा प्रदेश सरकार सदैव प्रतिबद्ध रहने प्रतिवद्धता जनाउनुभयो।

कार्यक्रममा अध्यक्षता गरेका मधेश प्रदेशका खेलकुद तथा समाज कल्याण मन्त्री प्रमोद जयसवालले “खेलौँ मधेश, जितौँ मधेश” अभियान अन्तर्गत आगामी वर्ष थप कार्यक्रम ल्याइने जानकारी दिनुभयो। उहाँले मधेशमा खेलकुदको वातावरण बनिरहेकामा सन्तोष व्यक्त गर्नुभयो।

८४ खेलाडीको सहभागिता, ५० लाख बजेट

मधेश प्रदेश खेलकुद परिषद्का सदस्य–सचिव शिवजी प्रसाद कानुले प्रतियोगितामा सातै प्रदेशबाट १२–१२ जनाका दरले कुल ८४ जना खेलाडी, साथै प्रशिक्षक, व्यवस्थापक, निर्णायक, अफिसियल तथा स्वयंसेवक समेत गरी ५० जनाभन्दा बढीको सहभागिता रहने जानकारी दिनुभयो।

प्रतियोगिता बिहीबारदेखि शनिबार सम्म सञ्चालन हुनेछ। प्रतियोगिताका विजेता टोलीले २५ हजार, दोस्रोले २० हजार र तेस्रो टोलीले १५ हजार नगद पुरस्कार प्राप्त गर्नेछन्।

कबड्डी जस्तो लोकलय खेलको राष्ट्रिय स्तरको आयोजनाले मधेशको मौलिकता र पहिचानलाई अझ प्रस्ट पार्ने अपेक्षा गरिएको छ।