धनुषा ग्यास व्यवसायी संघको भवन शिलान्यास, ४५ लाख लागतमा बन्ने

मोनु गुप्ता 

जनकपुरधाम , साउन २३ गते

धनुषा ग्यास व्यवसायी संघको कार्यालय भवनको आज शुक्रबार बिहान जनकपुरधाम वार्ड १२ मा शिलान्यास गरिएको छ।

उपमहानगरपालिका प्रमुख मनोजकुमार साहको प्रमुख आतिथ्यतामा र संघ अध्यक्ष फुलदेव पण्डितले संयुक्त रूपमा शिलान्यास गरे।

कार्यक्रममा नगरप्रमुख साहले भने, “ग्यास दैनिक उपभोग्य वस्तु भएकाले यससँग सम्बन्धित संस्थाको कार्यालय स्थापना हुनु जनकपुर धाम बासिका लागि खुशीको कुरा हो। भवन निर्माण सम्पन्न भएपछि सामाजिक कार्यका साथै सेवा प्रवाह अझ सहज र व्यवस्थित हुनेछ।”

त्यस्तै, संघ अध्यक्ष फुल्देव पण्डितले भने, “झन्डै ४५ लाख रुपैयाँ लागतमा बन्ने यो भवनमा मिटिङ हल सहित आवश्यक कार्यालय कोठाहरू रहनेछन्। यो भवन ग्यास व्यवसायी तथा उपभोक्ताको हकहितमा प्रभावकारी रूपमा प्रयोग हुनेछ।”

स्थानीय सरोकारवालाले यो भवनले जनकपुरधाममा ग्यास व्यवसायीहरूको संगठनात्मक संरचना मजबुत बनाउन र सेवाहरू अझ पारदर्शी बनाउन टेवा पुर्याउने विश्वास व्यक्त गरेका छन्।

शिलान्यास स्थलमा जनकपुर उद्योग वाणिज्य संघका अध्यक्ष सुरेन्द्र भण्डारी ,स्थानिय नागरिक समाज, व्यापारी लगायतका सहभागिता रहेका थिए।