अन्तराष्टिय युवा दिवसमा ‘टेस्ट एण्ड टक’ : परिकार, संस्कृति र नवप्रवर्तनको संगम

राष्ट्रिय आवाज 

बर्दिबास, साउन २७ मंगल बार— “टेस्ट एण्ड टक अफ मधेश: स्थानीय खाना, संस्कृति र नवप्रवर्तनका लागि युवा” भन्ने नारासहित अन्तर्राष्ट्रिय युवा दिवस २०२५ को अवसरमा बर्दिबासमा भव्य फुड फेस्टिवल र सांस्कृतिक कार्यक्रम सम्पन्न ।

कार्यक्रमको आयोजना मधेश प्रदेश युवा टोली र वर्ल्ड फुड फोरमले संयुक्त रूपमा गरेको हो। यसमा प्राकृतिक स्रोत व्यवस्थापन कलेज, बर्दिबास, बर्दिबास नगरपालिका वडा नं. ६, खाद्य तथा कृषि संगठन (FAO) , IAAS LC बर्दिबास र जनजागृत माध्यामिक विद्यालय बर्दिबासको सहआयोजनामा गरिएको थियो।

कार्यक्रममा ४ सयभन्दा बढी युवाको सहभागिता रहेको थियो। प्रमुख अतिथि सहायक प्राध्यापक अभिषेक श्रेष्ठ, कृषि कलेजको प्रिन्सिपल; चन्द्रपुर गाउँपालिकाका प्रमुख तथा मोरिङ्गा विज्ञ; राज कुमार महतो, बर्दिबास नगरपालिका वडा नं. ६ का वडाध्यक्ष पदम आले मगर; सचिन कुमार सिंह, मिथिला वाइल्डलाइफ ट्रस्टका निर्देशक; विजय चौधरी, कृषि जैविक विविधता विज्ञ; र सुनिल चौधरी, कृषि-अर्थशास्त्रका सहायक प्राध्यापक लगायतको उपस्थिति थियो।

मुख्य सत्रमा “कृषि नवप्रवर्तनमा युवा, स्थानीय खाना र सांस्कृतिक मूल्य” विषयमा प्यानल छलफल गरिएको थियो। विद्यार्थीहरूले तयारी गरेका विविध परिकारहरूको प्रदर्शनीमा सहभागीहरूले चासोपूर्वक अवलोकन मात्र गरेनन्, परिकारको बनावट, पोषण मूल्य र बजार सम्भावनाबारे सुझाव पनि दिए। कार्यक्रममा स्थानीय कृषि उत्पादनको संरक्षण, प्रवर्द्धन र बजारिकरणका रणनीतिहरू बारे मूल्यवान् सुझावहरू प्रस्तुत गरिए।

क्याम्पस प्रमुख अभिषेक श्रेष्ठले स्वदेशी बाली प्रवर्द्धनमा इच्छुक विद्यार्थीहरूका लागि उद्यमशीलता र इन्क्युबेशन सेन्टर स्थापना गर्ने घोषणा गरे। वडाध्यक्ष पदम आले मगरले बजेट र आवश्यक प्रक्रिया मार्फत् यस योजनामा साथ दिने प्रतिबद्धता जनाए। मोरिङ्गा विज्ञले मोरिङ्गा र अन्य स्थानीय उत्पादनमा आधारित उद्यमशीलताको लागि तालिम र कोष संकलन प्लेटफर्म उपलब्ध गराउने वाचा गरे।

कार्यक्रमले युवाहरूमा स्थानीय परिकार र सांस्कृतिक धरोहरप्रति गर्व र नवप्रवर्तनको भावना जगाएको सहभागीहरूले बताएका छन्। कार्यक्रम अन्त्यमा सबै पक्षले यसलाई केवल उत्सव मात्र नभई, स्थानीय स्रोत र सीपलाई उद्यममा परिणत गर्ने अभियानको थालनीका रूपमा लिने प्रतिबद्धता व्यक्त गरे।