राजनीतिक परिवर्तन पर्याप्त छैन, अब आर्थिक–सामाजिक सशक्तीकरण आवश्यक : अध्यक्ष यादव

मोनु गुप्ता 

जनकपुरधाम, मंसिर १३ गते 

जनता समाजवादी पार्टी नेपालका अध्यक्ष उपेन्द्र यादवले मुलुकमा पटक–पटक राजनीतिक परिवर्तन भए पनि आर्थिक र सामाजिक रुपान्तरण हुन नसकेको बताएका छन्।

शनिबार जनकपुरधाममा आयोजित दलित, पिछडावर्ग, थारु, आदिवासी तथा अल्पसंख्यक (डोटिम) परिसंघ धनुषा द्वारा आयोजित जिल्ला स्तरीय वृहत अन्तरक्रिया कार्यक्रममा सम्बोधन गर्दै अध्यक्ष यादवले राजनीतिक परिवर्तनले मात्र देश समृद्ध नहुने स्पष्ट पारे।

उनका अनुसार, समाजिक तथा आर्थिक क्षेत्रमा ठोस परिवर्तन नगरेसम्म परिवर्तनको प्रभाव जनजीवनमा महसुस हुने छैन। “अबको क्रान्ति आर्थिक र सामाजिक रुपान्तरणका लागि हुनुपर्छ, त्यसको नेतृत्व डोटिम परिसंघले लिनुपर्छ,” उनले भने।

समाजको तल्लो तहमा रहेका समुदायहरूको अवस्था सुधार नभएसम्म राजनीतिक उपलब्धिको सार्थकता नहुने अध्यक्ष यादवको तर्क थियो। समाजमा रहेको विकृति–विसंगति अन्त्य नगरी लोकतन्त्र बलियो नबन्ने उल्लेख गर्दै उनले दलित, पिछडावर्ग र अल्पसंख्यकहरू लाई सत्तादेखि निर्णय प्रक्रिया सम्म पहुँच दिलाउनुपर्ने आवश्यकता औंल्याए।

छुट्टाछुट्टै संघर्षले समानताको अधिकार प्राप्त गर्न नसकिने बताउँदै यादवले डोटिम परिसंघ लाई सामूहिक शक्ति निर्माण गर्ने साझा मञ्चका रूपमा अघि बढ्न आग्रह गरे।

rastriyaawaj@gmail.com