संगीत, संस्कृति र स्वादको उज्यालोमा नयाँ वर्ष स्वागत गर्दै गौतम होटल

जीवनराज दाहाल 

बर्दिवास, पुस १४ गते,महोत्तरी 

समयको चक्र फेरिँदै नयाँ वर्षको संघारमा आइपुग्दा हरेक मनमा नयाँ आशा, नयाँ ऊर्जा र नयाँ उत्साह पलाउँछ । यही उत्साहलाई संगीत, संस्कृति र पर्यटनसँग जोडेर उत्सवको रूप दिने उद्देश्यसहित धनुषाको लालगढ स्थित गौतम होटलले अङ्ग्रेजी नयाँ वर्ष २०२६ को अवसरमा विशेष सांस्कृतिक महोत्सव आयोजना गर्ने भएको छ ।

नयाँ वर्षको साँझलाई अविस्मरणीय बनाउने लक्ष्यसहित आयोजना हुन लागेको यस महोत्सवमा सुप्रसिद्ध गायक प्रमोद खरेल तथा उहाँको लोकप्रिय ब्याण्ड “परम्परा” ले प्रत्यक्ष (Live) सांगीतिक प्रस्तुति दिनेछन् । स्वर, शब्द र लयको संगम सँगै नेपाली मौलिकता, परम्परा र सांस्कृतिक पहिचान झल्किने विविध प्रस्तुतीहरूले महोत्सवलाई अझ जीवन्त बनाउने आयोजकले जनाएको छ ।

निजी क्षेत्रको अग्रसरतामा आयोजना हुन लागेको यस कार्यक्रमलाई मनोरञ्जनमा मात्र सीमित नराखी पर्यटन प्रवर्द्धनको प्रभावकारी माध्यमका रूपमा अघि बढाइने लक्ष्य लिइएको छ । नयाँ वर्षको अवसरमा नेपालका विभिन्न जिल्ला सँगै भारतको बिहार राज्य अन्तर्गत सीतामढी, मधुबनी, दरभंगा, जयनगर लगायत क्षेत्रबाट उल्लेख्य संख्यामा आगन्तुक आउने अपेक्षा गरिएको छ ।

यस महोत्सवले स्थानीय होटल, व्यवसाय र आतिथ्य क्षेत्रलाई नयाँ गति दिने विश्वास गरिएको छ । संगीत र संस्कृतिसँगै स्वादलाई पनि उत्सवको केन्द्रमा राख्दै मधेस प्रदेशको पहिचान बोकेका परम्परागत तथा स्वादिष्ट परिकारहरू प्रस्तुत गरिनेछन् ।

गौतम होटलका सञ्चालक हिरा गौतमका अनुसार, “कलैयाको सेकुवा, रौतहटको कटिया, जनकपुरको ललन माछा, बरमझिया (सप्तरी) को पेडा, धनुषाको कठाल दही तथा विभिन्न स्थानका चर्चित मिष्ठान्न परिकारमार्फत अतिथिलाई मधेसको मौलिक स्वाद र सुगन्ध सम्झनलायक बनाउने हाम्रो प्रयास हो ।”

महोत्सवमा सहभागिताका लागि होटलले तीन तहको टिकट व्यवस्था गरेको छ । पहिलो तहको टिकट रु. ५,०००, दोस्रो तहको रु. ३,५०० र तेस्रो तहको रु. २,५०० तोकिएको छ । उक्त टिकटमा कार्यक्रम अवलोकन सँगै तोकिएको प्याकेज अनुसार खाना, स्न्याक्स तथा ड्रिङ्क्सको समेत व्यवस्था गरिएको आयोजकले जनाएको छ ।

विशेष फुड स्टल मार्फत आगन्तुकहरू लाई मधेसको मौलिक संस्कृति र स्वादसँग प्रत्यक्ष साक्षात्कार गराउने उद्देश्य राखिएको छ । संगीत, संस्कृति र स्वादको त्रिवेणी सँगै नयाँ वर्षलाई स्वागत गर्ने यस महोत्सवमा सहभागी भई कार्यक्रमलाई सफल बनाउन गौतम होटल परिवारले सबैलाई हार्दिक आमन्त्रण गरेको छ ।