मुसहर समुदायलाई नागरिकता सम्बन्धी अभिमुखीकरण कार्यक्रम

अर्जुन कुमार साह 

जनकपुर धाम, चैत्र ६ गते 

धनुषा जिल्लाको क्षिरेश्वरनाथ नगरपालिका–६ सखुवामा मुसहर समुदायलाई लक्षित गरी नागरिकता सम्बन्धी अभिमुखीकरण कार्यक्रम सम्पन्न गरिएको छ। उक्त कार्यक्रम लुथरन वल्ड फेडरेशन नेपालको सहयोग,लुथरन सामुदायिक कल्याण समाजको समन्वय र ऋषीबंश एकता सेवा समाज नेपालको आयोजनामा सम्पन्न भएको हो।

कार्यक्रमको उद्देश्य मुसहर समुदायमा नागरिकता प्राप्ति सम्बन्धी कानुनी प्रावधान, आवश्यक कागजात, प्रक्रिया तथा नागरिकता नहुँदा भोग्नुपरेका समस्याबारे जानकारी गराउनु रहेको थियो । कार्यक्रममा सहभागीहरूलाई जन्मदर्ता, नागरिकता तथा नागरिकता सिफारिस प्रक्रियाबारे जानकारी गराउदै पिडितलाई थप सहयोग गर्न पैरवी वारे विस्तृत जानकारी प्रदान गरिएको थियो ।

अभिमुखीकरण कार्यक्रममा विशेषगरी अभिभावक सँग नागरिकता नहुनु, आवश्यक कागजातको अभाव, प्रक्रिया सम्बन्धी जानकारी कमी तथा सिफारिस लिन कठिनाइ जस्ता समस्याहरू बारे छलफल गरिएको थियो । वक्ताहरूले नागरिकता प्रत्येक नागरिकको मौलिक अधिकार भएकाले मुसहर समुदाय जस्ता पछाडि परेका वर्गसम्म यसको पहुँच सुनिश्चित गर्न स्थानीय तह र सम्बन्धित निकायको सहकार्य आवश्यक रहेको बताएका थिए ।

कार्यक्रममा २५ जना मुसहर समुदायका महिला, पुरुष तथा युवाहरूको सहभागिता रहेको थियो । सहभागीहरूले यस्ता कार्यक्रमले नागरिकता सम्बन्धी अन्योल हटाउन तथा आवश्यक प्रक्रिया बुझ्न सहज भएको बताएका थिए ।

कार्यक्रमको अन्त्यमा मुसहर समुदायका नागरिकलाई नागरिकता प्राप्तिमा सहजीकरण गर्न स्थानीय सरकार, सरोकारवाला निकाय तथा समुदायबीच निरन्तर समन्वय र पैरवी आवश्यक रहेको निष्कर्ष निकालियो ।