बाल अधिकार सुदृढीकरणतर्फ खडक नगरपालिका अघि बढ्दै

शिवशंकर मण्डल
सप्तरी, बैशाख ९ गते
स्थानीय तहमा बाल सहभागिता लाई संस्थागत र प्रभावकारी बनाउने उद्देश्यले खडक नगरपालिकामा “स्थानीय तहमा सहभागितामूलक सफलता घोषणा कार्यक्रम” सम्पन्न भएको छ। सेभ द चिल्ड्रेन र सबल नेपाल को सहकार्यमा आयोजित कार्यक्रम आज नगरपालिकाको बैठक हल, कल्याणपुरमा सम्पन्न भएको हो।
कार्यक्रममा बाल कल्याण अधिकारी अनिता कुमारी शाहको अध्यक्षता रहेको थियो भने नगर प्रमुख जयप्रकाश चौधरी प्रमुख अतिथिका रूपमा उपस्थित थिए। त्यसैगरी नगर उपप्रमुख रिता कुमारी चौधरी विशिष्ट अतिथिका रूपमा सहभागी भइन्।
प्रमुख अतिथि चौधरीले बालबालिकाको अधिकार सुनिश्चित गर्न स्थानीय तहको भूमिका महत्वपूर्ण रहेको उल्लेख गर्दै बालमैत्री नीति तथा कार्यक्रममार्फत उनीहरूको सहभागिता अझ सुदृढ गरिने बताए। उनले बाल क्लब सञ्जाललाई सक्रिय र जिम्मेवार रूपमा परिचालन गर्दै बालबालिकाको आवाजलाई नीति निर्माणसम्म पुर्‍याउन नगरपालिका प्रतिबद्ध रहेको स्पष्ट पारे।
कार्यक्रममा प्रशासन शाखा प्रमुख रामाकान्त चौधरी, पञ्जीकरण शाखाका रन्जित चौधरी, स्वास्थ्य शाखाका गयाप्रसाद चौधरी, सबल नेपालका फिल्ड म्यानेजर रोशन कुमार मण्डल, फिल्ड संयोजक अशोक कुमार शाह तथा अनुगमन संयोजक चन्दन कुमार चौधरीलगायतको उपस्थिति रहेको थियो।
नगर बाल क्लब सञ्जालका अध्यक्ष शिवशंकर मण्डलले कार्यक्रम सञ्चालन गरेका थिए। कार्यक्रममा नगर बाल क्लब सञ्जाल तथा वडा बाल क्लब सञ्जाललाई प्रशंसापत्र प्रदान गर्दै उनीहरूको सक्रिय योगदानको कदर गरिएको थियो।
साथै, आगामी दिनमा बाल क्लब सञ्जाललाई कसरी प्रभावकारी रूपमा सञ्चालन गर्ने भन्ने सम्बन्धमा कार्ययोजना हस्तान्तरण गरिएको आयोजकले जनाएको छ। बालबालिकाको सहभागिता बढाउँदै स्थानीय शासनमा उनीहरूको आवाज सशक्त बनाउने उद्देश्यले कार्यक्रम आयोजना गरिएको हो।