कानुन दिवसमा जनकपुरधाममा न्यायिक महोत्सव, न्याय प्रणालीबारे जनचेतना फैलाइने

राष्ट्रिय आवाज 

जनकपुरधाम । मधेश प्रदेशमा पहिलो पटक न्यायिक महोत्सव आयोजना हुने भएको छ । कानुन दिवसको अवसरमा शनिबार जनकपुरधाममा उक्त महोत्सव आयोजना गर्न लागिएको उच्च अदालत जनकपुर का कायममुकायम प्रमुख न्यायाधीश टेक नारायण कुँवर ले जानकारी दिएका छन् ।

आज शुक्रबार जनकपुरधाममा आयोजित पत्रकार सम्मेलनमार्फत प्रमुख न्यायाधीश कुँवरले महोत्सव बारे जानकारी दिएका हुन् । उनका अनुसार महोत्सवमा उच्च अदालत जनकपुर अन्तर्गत रहेका उच्च अदालत वीरगञ्ज इजलास र उच्च अदालत सिरहा इजलास सहित पुनरावेदन सुन्ने आठवटै जिल्लाका न्यायाधीश, सरकारी वकिल, कार्यालय प्रमुख, कर्मचारी तथा नागरिक समाजका प्रतिनिधिहरूको सहभागिता रहनेछ ।

जनकपुरधाम स्थित महेन्द्र नारायण निधि सांस्कृतिक केन्द्र मा आयोजना हुने महोत्सवमा जनचेतना अभिवृद्धि गर्ने, न्याय सम्पादन प्रक्रियाबारे जानकारी गराउने तथा अदालत र सरकारी वकिल कार्यालयले गर्ने कामकारबाही बारे जानकारी दिने लगायतका कार्यक्रम सञ्चालन गरिने बताइएको छ ।

त्यसैगरी कार्यक्रममा परामर्श, अन्तरक्रिया तथा प्रस्तुतीकरण सम्बन्धी कार्यक्रम पनि समावेश गरिएको प्रमुख न्यायाधीश कुँवरले जानकारी दिए । कार्यक्रमको उद्घाटन भर्चुअल माध्यमबाट सर्वोच्च अदालत का प्रधानन्यायाधीशले गर्ने जनाइएको छ ।

कार्यक्रमका प्रमुख अतिथि सुरेन्द्र लाभ कर्ण रहनेछन् । साथै कृष्ण प्रसाद यादव र फकिरा महतो ले पनि सम्बोधन गर्ने कार्यक्रम रहेको जनाइएको छ ।