आमा–छोराको शंकास्पद मृत्यु : परिवार द्वारा हत्याको आरोप, निष्पक्ष छानबिनको माग

डी एस मण्डल

जनकपुरधाम, जेठ ३ गते 

 धनुषाको धनुषाधाम नगरपालिकामा एक महिला र उनका १८ महिनाका छोरा मृत अवस्थामा फेला परेको घटनाले नयाँ मोड लिएको छ । मृतकका माइती पक्षले आमा–छोराको हत्या गरिएको आरोप लगाउँदै निष्पक्ष अनुसन्धानको माग गरेका छन् ।

गत वैशाख २४ गते धनुषाधाम नगरपालिका–७ किसानपुर निवासी २४ वर्षीया बबिता साह आफ्नै घरमा झुण्डिएको अवस्थामा फेला परेकी थिइन् भने उनका १८ महिनाका छोरा पनि मृत अवस्थामा भेटिएका थिए । जिल्ला प्रहरी कार्यालय धनुषाका अनुसार प्रारम्भिक अनुसन्धानमा बबिताले आफ्ना छोराको हत्या गरी आफूले आत्महत्या गरेको देखिएको जनाएको छ ।

तर आइतबार जनकपुरधाममा आयोजित पत्रकार सम्मेलनमा मृतक बबिताकी आमा बिणा देवी साहले छोरी र नातिको हत्या गरिएको दाबी गरिन् । उनले छोरीलाई हत्या गरेर झुण्ड्याइएको तथा नातिको पनि हत्या गरिएको आरोप लगाइन् ।

उनका अनुसार ज्वाइँ धर्मेन्द्र साह केही दिनअघि मात्रै वैदेशिक रोजगारीबाट घर आएर पुनः विदेश फर्किएका थिए । करिब २० दिनअघि उनी विदेश गएको बताइएको छ ।

बिणा देवी साहले वैशाख २३ गते राति बबिताको आफ्ना ससुरा प्रमोद साह, जेठाजु विरेन्द्र साह, सासु तथा जेठानीसँग विवाद भएको बताइन् । “मेरो छोरी पढेलेखेकी थिइन्, उनी सधैं केही राम्रो गर्न खोज्थिन् । यही कुरा उनीहरूलाई मन पर्दैनथ्यो,” उनले पत्रकार सम्मेलनमा भनिन् ।

घरायसी हिसाब–किताबको विषयलाई लिएर विवाद भएको र सोही राति छोरी तथा नातिको हत्या गरिएको उनको आरोप छ । घटनाको निष्पक्ष अनुसन्धान गरी दोषी माथि कारबाही गर्न उनले सम्बन्धित निकायसँग माग गरेकी छन् ।