सिरहामा दुई छुट्टाछुट्टै दुर्घटनामा ३ जनाको मृत्यु

कार्तिक १०, २०७९
बिनोद ठाकुर

सिरहा — सिरहामा छुट्टाछुट्टै सवारी दुर्घटनामा परी बुधबार राति तीन जनाको मृत्यु भएको छ ।

छठ पर्वको लागि कल्याणपुर बजारतर्फ केरा बिक्रीका लागि लैजाँदै गर्दा सिरहाको पर्चिलवामा नम्बर मेटिएको ट्रयाक्टर पल्टिँदा चालक कल्याणपुर नगरपालिका–४ का छेदुवा गोइत र केरा धनी सोही नगरपालिका–११ का दुखिया साहको मृत्यु भएको छ । बुधबार राति ट्रयाक्टर अनियन्त्रित भई दुर्घटना हुँदा च्यापिएर दुवै जनाको घटनास्थलमै मृत्यु भएको प्रहरीले जनाएको छ । घटनाबारे अनुसन्धान भइरहेको प्रहरीले जनाएको छ ।
यसैगरी, सिरहाको मिर्चैया नगरपालिका–५ मा बुधबार साँझ दुई मोटरसाइकल एक आपसमा ठोक्किँदा मिर्चैया नगरपालिका–६ का १९ वर्षीय जितेन्द्र साहको मृत्यु भएको छ । दुर्घटनामा परी टाउकोमा गम्भीर चोट लागेका साहलाई तत्काल स्थानीय मंगलम अस्पतालमा पुर्‍याइए पनि चिकित्सकले मृत घोषण गरेको इलाका प्रहरी कार्यालय मिर्चैयाले जनाएको छ ।

मोटरसाइकलमा पछाडि सवार १६ वर्षीय सम्राट साह गम्भीर घाइते भएका छन् । घाँटी र टाउकोमा चोट लागेका उनलाई थप उपचारका लागि विराटनगर लगिएको छ । स। ८ प ३४०५ र प्र।२–०१ ००१ प १६८२ नम्बरको मोटरसाइकल एक आपसमा ठोक्किएको थियो ।

प्र।२–०१ ००१ प १६८२ नम्बरको मोटरसाइकलमा सवार सिरहा कल्याणपुर नगरपालिका–७ भोक्राहाका ४२ वर्षीया अनिता देवी साह, मिर्चैया–१ की ४४ वर्षीया ललिता देवी महासेठ घाइते छन् । उनीहरुको स्थानीय अस्पतालमा उपचार भइरहेको प्रहरीले जनाएको छ ।