जनकपुरधाममा पुस २५ बाट एमबिबिएसको पढाइ सुरु हुने

जनकपुरधाम, पुस १६ मंगल बार 

मधेश प्रदेश सरकार अन्तर्गतको जनकपुर धाम स्थित मधेश स्वास्थ्य विज्ञान प्रतिष्ठानमा आगामी पुस २५ गतेबाट चिकित्सा शास्त्रतर्फ स्नातक (एमबिबिएस) को पठनपाठन सुरु हुँदैछ । एमबिबिएस अध्ययन अध्यापन सुरु गराउन आवश्यक भौतिक पूर्वाधारको स्तरोन्नति, थप उपकरणसहित विशिष्टीकृत ल्याब सञ्चालन तथा विभिन्न फ्याकल्टीका लागि जनशक्ति व्यवस्थापन तथा चिकित्साशिक्षा आयोगले छात्रवृत्तिमा पढ्न सिफारिस गरेका विद्यार्थी भर्ना कार्य सम्पन्न भइसकेको प्रतिष्ठानका उपकुलपति डा.अंकुर साहले बताए ।

मधेश प्रदेशमा सरकारीस्तरमा एमबिबिएसको पठनपाठन हुने प्रतिष्ठान पहिलो शैक्षिक संस्था भएको छ । 

उनले चिकित्साशिक्षा आयोगले निर्धारण गरेको रकम भुक्तान गरी एमबिबिएस पढ्न चाहनेहरूका लागि भने आगामी पुस २४ गतेसम्म नामांकन हुने जानकारी दिए । प्रतिष्ठानमा अहिले स्नातकतर्फ नर्सिङ, पब्लिक हेल्थ र मेडिकल ल्याब टेक्नोलोजी तथा चिकित्साशास्त्रको स्नातकोत्तरतर्फ चार विषयमा पठनपाठन हुँदैआएको छ । 

चिकित्साशास्त्रमा महँगो र लामो अवधिको पढाइ एमबिबिएस भने यसै शैक्षिकसत्र बाट सुरु गरिएको छ । प्रदेश मन्त्रिपरिषद् बैठकले प्रतिष्ठान अन्तर्गतको प्रादेशिक अस्पताल जनकपुरको स्तरोन्नति गर्दै एमबिबिएस अध्ययन गराउन स्रोत सुनिश्चित गर्ने निर्णयपछि यसका लागि गत साउन महिनाबाट भौतिक पूर्वाधार, उपकरण, अस्पतालको सेवा विस्तार तथा गुणस्तरवृद्धि, जनशक्ति व्यवस्थापन कार्ययोजना लगायतका कार्य कार्यान्वयन गरिएको थियो । त्यसलगत्तै एमबिबिएस कक्षा सञ्चालनका लागि आवश्यक तयारी सुरु गरिएको थियो । चिकित्साशिक्षा आयोगले भने गत भदौमा ५० विद्यार्थीको कोटा दिँदै एमबिबिएस कक्षा सञ्चालन गर्न प्रतिष्ठानलाई स्वीकृति दिएको थियो । 

प्रदेशका मुख्यमन्त्री सतिशकुमार सिँहले प्रदेश सरकारका कार्यकारी प्रमुखका रूपमा कार्यभार सम्हालिरहँदा जनमत पार्टीको शिक्षा सम्बद्ध दृष्टिका आधारमा मधेशमा सरकारी तवरमा एमबिबिएसको पठनपाठन सुरु गराउने प्रतिबद्धता व्यक्त गरेका थिए ।

प्रतिष्ठानका उपकुलपति डा.साहले एमबिबिएस पठनपाठनका लागि प्रादेशिक अस्पताल जनकपुर परिसरमै कक्षाकोठा, छात्रावास आदिको व्यवस्था गरिएको बताए । उनले क्लिनिकल अध्ययनका लागि पहिलेदेखिकै पूर्वाधारको स्तरोन्नति गरिएको र आधारभूत चिकित्सा विज्ञान अन्तर्गत एनाटोमी, फिजियोलोजी, बायोकेमेस्ट्री, माइक्रोबायोलोजी, प्याथालोजी, फर्माकोलोजी, क्म्युनिटी मेडिसिनलगायत विषय अध्यापन गराउन जनशक्ति व्यवस्थापन गरिएको बताए । 

जनकपुरधामस्थित प्रतिष्ठानमा एमबिबिएसको पठनपाठन सुरु भएपछि चिकित्सासेवामा सुधार, चिकित्सकको वृत्तिविकासमा टेवा, चिकित्साशास्त्रको अध्ययनअनुसन्धानमा तीव्रता र जनकपुरधामको शैक्षिक छविमा सकरात्मक परिवर्तन आउने विश्वास गरिएको छ ।