जनकपुरधाम सहित तराईका जिल्लाहरु शीतलहरले प्रभावित

इन्द्र भुषण यादव 

जनकपुरधाम , पुस २४ बुधबार 

जनकपुरधाम सहित तराईका जिल्लाहरु चार दिनदेखि एक्कासि बढेको शीतलहर तथा बाक्लाे हुस्सुका कारण जनजीवन कष्टकर बनेको छ । 

शीतलहरले चिसो बढेपछि जनकपुरधाममा चहलपहल घटेको छ । कुहिराे सँगै चल्ने चिसो हावाले घरबाहिर निस्कन समेत समस्या हुने गरेको स्थानीय वासीहरुले बताएका छन् । 

अत्यधिक चिसोका कारण जनकपुरधामकाे प्रदेशीक अस्पतालमा पनि बिरामीहरु चिसोबाट प्रभावित भएको अस्पताल स्रोतले जनाएको छ ।

खासगरी अस्पतालमा बालबालिका , वृद्धवद्धामा लाग्ने निमाेनिया , खाेकी , घाँटी दुख्नेजस्ता राेगका बिरामी अस्पतालमा देखापर्न थालेकाे बताइएको छ । यस्तै , बालबालिकामा काेलडेरिया, निमाेनिया , ज्वरो , घाँटी दुख्ने , घाँटीमा टन्सिल देखापर्नेजस्ता बिरामी अहिले अस्पतालमा उपचारका लागि आउने गरेको अस्पतालले जनाएको छ । 

चिसोले तराईका ग्रामीण भेगहरुमा पनि बालबालिका देखि लिएर वृद्धवद्धा सम्म प्रभावित भएका छन् । आज बिहानै देखि जनकपुरधाम उप महानगरपालिकाको पहलमा चाैक चौकमा दाउरा वितरण गरेका छन। 

चिसाेकै कारण सवारीसाधनमा यात्रुको चाप घटेकाे छ । चिसोले बिहानपख यात्रु नपाई कतिपय गाडीकाे समय तालिका परिवर्तन गर्नु परेको यातायात व्यवसायीले बताउँछन् । एक्कासि अत्यधिक चिसो बढेपछि जिल्लाहरुमा रहेका विभिन्न सरकारी कार्यालयमा सेवाग्राहीकाे र विद्यालयहरुमा विद्यार्थीहरु काे उपस्थितिसमेत न्यून देखिएको छ ।